By Suktha News 
ಬೆಂಗಳೂರು : ರಾಜ್ಯ ರಾಜಧಾನಿಯ ಪೆಟ್ರೋಲ್ ಬಂಕ್ಗಳು ಇಂಧನ ಅಳತೆಯಲ್ಲಿ ಮೋಸ ಮಾಡುತ್ತಿರುವ ಸಂಬಂಧ ಕಾನೂನು ಮಾಪನಶಾಸ್ತ್ರ ಇಲಾಖೆ ಕ್ರಮಕ್ಕೆ ಮುಂದಾಗಿದೆ. ಬೆಂಗಳೂರು ನಗರದ ಪೆಟ್ರೋಲ್ ಬಂಕ್ಗಳ ಮೇಲೆ ಇಲಾಖೆ ಸರಣಿ ಕಾರ್ಯಾಚರಣೆ ಆರಂಭಿಸಿದೆ.
ಮೊದಲ ಹಂತದಲ್ಲಿ 62 ಬಂಕ್ಗಳ ಮೇಲೆ ದಾಳಿ ನಡೆಸಿರುವ ಕಾನೂನು ಮಾಪನಶಾಸ್ತ್ರ ಇಲಾಖೆ ಅಧಿಕಾರಿಗಳು, ಅಕ್ರಮ ಕಂಡು ಬಂದ ಎರಡು ಬಂಕ್ಗಳಿಗೆ ದಂಡ ವಿಧಿಸಿ ದೂರು ದಾಖಲಿಸಿದ್ದಾರೆ. ಬೆಂಗಳೂರು ನಗರದ ಪೆಟ್ರೋಲ್ ಬಂಕ್ಗಳು ಅಳತೆ ಮಾಪನದ ಮೀಟರ್ನಲ್ಲಿ ತೋರಿಸುವ ಪ್ರಮಾಣಕ್ಕಿಂತ ಕಡಿಮೆ ಇಂಧನ ಹೊರಬರುವಂತೆ ಮಾಡಿ ವಂಚಿಸುತ್ತಿವೆ. ಈ ಸಂಬಂಧ ಗ್ರಾಹಕರಿಂದ ಹಲವು ದೂರುಗಳು ಬಂದಿದ್ದವು. ಈ ಹಿನ್ನೆಲೆಯಲ್ಲಿ ಕಾನೂನು ಮಾಪನಶಾಸ್ತ್ರ ಇಲಾಖೆ ನಿಯಂತ್ರಕರಾದ ಅನಿತಾ ಲಕ್ಷ್ಮಿ ಅವರ ಸೂಚನೆ ಮೇರೆಗೆ ಹೊರ ಜಿಲ್ಲೆಗಳ ಅಧಿಕಾರಿಗಳನ್ನು ಕರೆಸಿಕೊಂಡು ಅಕ್ಟೋಬರ್ 3 ರಿಂದ 5ರವರೆಗೆ ಈ ವಿಶೇಷ ಕಾರ್ಯಾಚರಣೆ ನಡೆಸಲಾಗಿತ್ತು.
ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (ಬಿಬಿಎಂಪಿ) ವ್ಯಾಪ್ತಿಯಲ್ಲಿ 568 ಪೆಟ್ರೋಲ್ ಬಂಕ್ಗಳಿದ್ದು, ಮೊದಲ ಹಂತದಲ್ಲಿ 62 ಬಂಕ್ಗಳ ಮೇಲೆ ಕಾನೂನು ಮಾಪನಶಾಸ್ತ್ರ ಇಲಾಖೆ ಅಧಿಕಾರಿಗಳು ದಾಳಿ ನಡೆಸಿದ್ದಾರೆ. ಈ ಪೈಕಿ ದಾಳಿ ವೇಳೆ ದಾಸನಪುರದ ಎಂಎಲ್ ಫ್ಯೂಯಲ್ ಸ್ಟೇಷನ್ ಮತ್ತು ಬಸವನಗುಡಿಯ ಬುಲ್ ಟೆಂಪಲ್ ಫ್ಯೂಯಲ್ ಸ್ಟೇಷನ್ ಬಂಕ್ಗಳಲ್ಲಿ ಅಳತೆ ಮಾಪನದ ಮೀಟರ್ನಲ್ಲಿ ತೋರಿಸುವ ಪ್ರಮಾಣಕ್ಕಿಂತ ಕಡಿಮೆ ಇಂಧನ ಹೊರಬರುವಂತೆ ಮಾಡಿ ವಂಚಿಸುತ್ತಿರುವುದು ಕಂಡು ಬಂದಿದೆ.