By Suktha News 
ಮಂಗಳೂರು: ಸಂದೇಶ ಪ್ರತಿಷ್ಠಾನ ವತಿಯಿಂದ ಆಯೋಜಿಸಲಾದ ಸಂದೇಶ ಪ್ರಶಸ್ತಿಗಳು–2026 ಕಾರ್ಯಕ್ರಮವು ಜ. 21 ರಂದು ಮಂಗಳೂರಿನ ಸಂದೇಶ ಸಂಸ್ಥೆ ಆವರಣದಲ್ಲಿ ಭವ್ಯವಾಗಿ ನೆರವೇರಿತು.
ಸೃಜನಶೀಲತೆ, ಸಾಮಾಜಿಕ ಬದ್ಧತೆ ಮತ್ತು ಸಾಂಸ್ಕೃತಿಕ ನಾಯಕತ್ವವನ್ನು ಪ್ರತಿಬಿಂಬಿಸುವ ಸಾಧಕರನ್ನು ಗೌರವಿಸುವ ಈ ಸಮಾರಂಭವು ಮೌಲ್ಯಯುತ ಸಮಾಜ ನಿರ್ಮಾಣದ ಸ್ಪಷ್ಟ ಸಂದೇಶವನ್ನು ಸಾರಿತು.
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ವಹಿಸಿದ್ದ ಬಲ್ಲಾರಿ ಧರ್ಮಪ್ರಾಂತ್ಯದ ಬಿಷಪ್ ಹಾಗೂ ಸಂಸ್ಥೆಯ ಅಧ್ಯಕ್ಷರು ಬಿಷಪ್ ಹೆನ್ರಿ ಡಿಸೋಜಾ ಅವರು ಮಾತನಾಡಿ ಕಲೆ, ಸಾಹಿತ್ಯ, ಶಿಕ್ಷಣ ಮತ್ತು ಸಾಮಾಜಿಕ ಸೇವೆಯಲ್ಲಿ ಮೌಲ್ಯಾಧಾರಿತ ಕೊಡುಗೆಗಳ ಅಗತ್ಯವನ್ನು ಒತ್ತಿ ಹೇಳಿದರು. ಕಳೆದ 35 ವರ್ಷಗಳಿಂದ ಸಂದೇಶ ಪ್ರತಿಷ್ಠಾನವು ಕಲೆ ಮತ್ತು ಸಾಹಿತ್ಯದ ಮೂಲಕ ಸಮಾಜದಲ್ಲಿ ಸದ್ಭಾವನೆ ಬೆಳೆಸುತ್ತಿರುವುದನ್ನು ಅವರು ಅಭಿನಂದಿಸಿದರು. ಇಂದಿನ ಸ್ಪರ್ಧಾತ್ಮಕ ಯುಗದಲ್ಲಿ ಮಾನವೀಯ ಮೌಲ್ಯಗಳನ್ನು ಮರೆಯಬಾರದೆಂದು ಎಚ್ಚರಿಕೆ ನೀಡಿ, ಪರಸ್ಪರ ಪ್ರೀತಿ–ಗೌರವ–ಸಹಬಾಳ್ವೆಯಿಲ್ಲದೆ ಯಾವುದೇ ಸಾಧನೆಗೆ ಅರ್ಥವಿಲ್ಲವೆಂದು ತಿಳಿಸಿದರು.
ಬರಹಗಾರರು ಮತ್ತು ಕಲಾವಿದರು ಸಮಾಜದ ಕಣ್ಣುಗಳಾಗಿದ್ದು, ತಮ್ಮ ಸೃಜನಶೀಲತೆಯಿಂದ ಅಂಕುಡೊಂಕುಗಳನ್ನು ತಿದ್ದುವ ಜವಾಬ್ದಾರಿ ಹೊಂದಿದ್ದಾರೆ ಎಂದರು. ಪ್ರಶಸ್ತಿ ಸಾಧನೆಯ ಅಂತ್ಯವಲ್ಲ ಅದು ಹೊಸ ಜವಾಬ್ದಾರಿಯ ಆರಂಭ ಎಂದು ಪ್ರಶಸ್ತಿ ವಿಜೇತರಿಗೆ ಮಾರ್ಗದರ್ಶನ ನೀಡಿದರು. ವೈವಿಧ್ಯತೆಯಲ್ಲಿ ಏಕತೆಯನ್ನು ಕಾಣುವುದೇ ಭಾರತೀಯತೆಯ ಸಾರ ಎಂದು ಶಾಂತಿ ಮತ್ತು ಐಕ್ಯತೆಯ ಸಂದೇಶವನ್ನು ಸಾರಿದರು.
ಮುಖ್ಯ ಅತಿಥಿಯಾಗಿ ಮಾತನಾಡಿದ ಖ್ಯಾತ ಚಲನಚಿತ್ರ ನಿರ್ದೇಶಕ, ಸಾಹಿತಿ ಹಾಗೂ ಗೀತಕಾರ ಡಾ. ನಾಗತಿಹಳ್ಳಿ ಚಂದ್ರಶೇಖರ್ ಅವರು, ಕಲೆ–ಸಾಹಿತ್ಯ–ಸಮಾಜದ ನಡುವಿನ ಸಂಬಂಧವನ್ನು ಆಳವಾಗಿ ವಿಶ್ಲೇಷಿಸಿದರು. ಸಂದೇಶ ಪ್ರತಿಷ್ಠಾನವು ಕೇವಲ ಪ್ರಶಸ್ತಿ ನೀಡುವ ಸಂಸ್ಥೆಯಲ್ಲ ವಿವಿಧ ಧರ್ಮ, ಭಾಷೆ ಮತ್ತು ಸಂಸ್ಕೃತಿಗಳನ್ನು ಬೆಸೆಯುವ ಸೇತುವೆಯಾಗಿದೆ ಎಂದು ಶ್ಲಾಘಿಸಿದರು. ಕಲೆ ಮನರಂಜನೆಗಾಗಿ ಮಾತ್ರವಲ್ಲ ಅದು ಮನುಷ್ಯನನ್ನು ಹೆಚ್ಚು ಮಾನವೀಯನನ್ನಾಗಿ ಮಾಡಬೇಕು. ಇಂದಿನ ಅಸಹಿಷ್ಣುತೆಗೆ ಪ್ರೀತಿ ಮತ್ತು ಕಲೆಯೊಂದೇ ಮದ್ದು ಎಂದು ಅಭಿಪ್ರಾಯಪಟ್ಟರು. ಮಂಗಳೂರು ಮತ್ತು ಕರಾವಳಿ ಭಾಗದ ಸಾಂಸ್ಕೃತಿಕ ವೈವಿಧ್ಯತೆ ಹಾಗೂ ಸಾಹಿತ್ಯಿಕ ಪ್ರಜ್ಞೆಯನ್ನು ಕೊಂಡಾಡಿ, ಅದು ಇಡೀ ನಾಡಿಗೆ ಮಾದರಿ ಎಂದರು. ಪ್ರಶಸ್ತಿಗಳು ಗೌರವದ ಜೊತೆಗೆ ಸಮಾಜದತ್ತ ಹೆಚ್ಚಿನ ಜವಾಬ್ದಾರಿಯನ್ನೂ ತರುತ್ತವೆ. ಪಾರದರ್ಶಕತೆ ಮತ್ತು ಅರ್ಹತೆಯ ಆಯ್ಕೆಯಿಂದ ಸಂದೇಶ ಪ್ರಶಸ್ತಿಗೆ ಗಾಂಭೀರ್ಯ ಬಂದಿದೆ ಎಂದು ಹೇಳಿದರು. ತಾಂತ್ರಿಕ ಯುಗದಲ್ಲೂ ಯುವಕರು ತಮ್ಮ ಬೇರುಗಳನ್ನು ಮರೆಯದೆ ಓದು ಮತ್ತು ಸಾಹಿತ್ಯದ ಮೂಲಕ ಆಲೋಚನಾ ವಿಸ್ತಾರ ಸಾಧಿಸಬೇಕು ಎಂದು ಕರೆ ನೀಡಿದರು. ಭಾಷಣದ ಸಮಾರೋಪದಲ್ಲಿ, “ಯುದ್ಧಗಳಿಗಿಂತ ಬುದ್ಧನ ಶಾಂತಿಯ ಮಾರ್ಗ ಇಂದು ಜಗತ್ತಿಗೆ ಅತಿ ಅವಶ್ಯಕ” ಎಂದು ಜಾಗತಿಕ ಶಾಂತಿಯ ಅಗತ್ಯವನ್ನು ಒತ್ತಿ ಹೇಳಿದರು.
“ಸಮಾರಂಭದಲ್ಲಿ ಮಂಗಳೂರು ಧರ್ಮಪ್ರಾಂತ್ಯದ ಬಿಷಪ್ ಆಗಿರುವ ಮಾನ್ಯ ಬಿಷಪ್ ಪೀಟರ್ ಪಾಲ್ ಸಲ್ದಾನಾ, ಕರ್ನಾಟಕ ಇಕೋ ಟೂರಿಸಂ ಬೋರ್ಡ್ನ ಅಧ್ಯಕ್ಷರಾದ ಶಾಲೆಟ್ ಪಿಂಟೊ, ಕೊಂಕಣಿ ಸಾಹಿತ್ಯ ಅಕಾಡೆಮಿಯ ಅಧ್ಯಕ್ಷರಾದ ಸ್ಟ್ಯಾನಿ ಆಲ್ವಾರೆಸ್, ಕರ್ನಾಟಕ ಬ್ಯಾರಿ ಸಾಹಿತ್ಯ ಅಕಾಡೆಮಿಯ ಅಧ್ಯಕ್ಷರಾದ ಉಮರ್ ಯು. ಎಚ್., ಮತ್ತು ಸಾಹಿತ್ಯ, ಸಂಸ್ಕೃತಿ ಹಾಗೂ ಸಾರ್ವಜನಿಕ ಜೀವನ ಕ್ಷೇತ್ರಗಳ ಅನೇಕ ಗಣ್ಯರು ಉಪಸ್ಥಿತರಿದ್ದರು.
ಅವರ ಸಾನಿಧ್ಯವು ಸಂಸ್ಕೃತಿಯೊಡನೆ ಮೌಲ್ಯಾಧಾರಿತ ಶ್ರೇಷ್ಠತೆಯನ್ನು ಉತ್ತೇಜಿಸುವ ಸಂದೇಶ ಪ್ರತಿಷ್ಠಾನದ ಧ್ಯೇಯಕ್ಕೆ ದೊರೆಯುತ್ತಿರುವ ವ್ಯಾಪಕ ಬೆಂಬಲವನ್ನು ಸ್ಪಷ್ಟಪಡಿಸಿತು.
ಉಡುಪಿ ಧರ್ಮಪ್ರಾಂತ್ಯದ ಬಿಷಪ್ ಆಗಿರುವ ಮಹಾನಿಯರಾದ ಮಾನ್ಯ ಬಿಷಪ್ ಜೆರಾಲ್ಡ್ ಐಸಾಕ್ ಲೋಬೊ, ಮಾನ್ಯ ಶಾಸಕರಾದ ಡಿ. ವೇದವ್ಯಾಸ ಕಾಮತ್ ಹಾಗೂ ಮಾನ್ಯ ವಿಧಾನ ಪರಿಷತ್ ಸದಸ್ಯರಾದ ಐವನ್ ಡಿಸೋಜಾ ಅವರು ಕಾರ್ಯಕ್ರಮ ಆರಂಭಕ್ಕೂ ಮೊದಲು ಸ್ಥಳಕ್ಕೆ ಭೇಟಿ ನೀಡಿ, ಪ್ರಶಸ್ತಿ ವಿಜೇತರು ಮತ್ತು ಗಣ್ಯ ಅತಿಥಿಗಳಿಗೆ ತಮ್ಮ ಶುಭಾಶಯಗಳನ್ನು ತಿಳಿಸಿದರು. ಆದರೆ ತಮ್ಮ ತುರ್ತು ಅಧಿಕೃತ ಕರ್ತವ್ಯಗಳ ಕಾರಣದಿಂದಾಗಿ ಕಾರ್ಯಕ್ರಮದಲ್ಲಿ ಮುಂದುವರಿದು ಭಾಗವಹಿಸಲು ಅಸಮರ್ಥತೆಯನ್ನು ವ್ಯಕ್ತಪಡಿಸಿದರು.
ಪ್ರಮುಖ ಅಂಶವಾಗಿ ಸಂದೇಶ ಪ್ರಶಸ್ತಿಗಳು–2026 ಪ್ರದಾನಿಸಲಾಯಿತು. ವಿವಿಧ ಕ್ಷೇತ್ರಗಳಲ್ಲಿ ಅಪೂರ್ವ ಸಾಧನೆ ಮಾಡಿದ
• ಸಂದೇಶ ಸಾಹಿತ್ಯ ಪ್ರಶಸ್ತಿ (ಕನ್ನಡ): ಡಾ. ನಾ. ಮೊಗಸಾಲೆ
• ಸಂದೇಶ ಸಾಹಿತ್ಯ ಪ್ರಶಸ್ತಿ (ಕೊಂಕಣಿ): ಪ್ಯಾಟ್ರಿಕ್ ಕೆ. ಮೋರಸ್
• ಸಂದೇಶ ಸಾಹಿತ್ಯ ಪ್ರಶಸ್ತಿ (ತುಳು): ಇಂದಿರಾ ಹೆಗಡೆ
• ಸಂದೇಶ ಮಾಧ್ಯಮ ಪ್ರಶಸ್ತಿ: ಎಸ್. ಜಿ. ತುಂಗಾರೆಣುಕ
• ಸಂದೇಶ ಕೊಂಕಣಿ ಸಂಗೀತ ಪ್ರಶಸ್ತಿ: ಸೈಮನ್ ಪೈಸು
• ಸಂದೇಶ ಕಲಾ ಪ್ರಶಸ್ತಿ: ಶ್ರೀನಿವಾಸ್ ಜಿ. ಕಪ್ಪಣ್ಣ
• ಸಂದೇಶ ಶಿಕ್ಷಣ ಪ್ರಶಸ್ತಿ: ಡಾ. ದತ್ತಾತ್ರೇಯ ಅರಳಿಕಟ್ಟೆ
• ಸಂದೇಶ ವಿಶೇಷ ಗೌರವ: ನವಜೀವನ ಅಂಗವಿಕಲರ ಪುನರ್ವಸತಿ ಕೇಂದ್ರ (ಬಳ್ಳಾರಿ) ಇವರಿಗೆ ಗೌರವಿಸಲಾಯಿತು.
ಪ್ರಶಸ್ತಿ ವಿಜೇತರನ್ನು ಕೇವಲ ವೃತ್ತಿಪರ ಶ್ರೇಷ್ಠತೆಯಿಗಾಗಿ ಮಾತ್ರವಲ್ಲ, ಸಮಾಜವನ್ನು ಶ್ರೀಮಂತಗೊಳಿಸುವ ದೀರ್ಘಕಾಲೀನ ಸೇವೆ ಮತ್ತು ಮೌಲ್ಯಾಧಾರಿತ ಬದ್ಧತೆಯಿಗಾಗಿ ಗೌರವಿಸಲಾಯಿತು. ಪ್ರಶಸ್ತಿ ಆಯ್ಕೆ ಪ್ರಕ್ರಿಯೆಯಲ್ಲಿ ಸಮತೋಲನ, ಪ್ರಭಾವ ಮತ್ತು ಸಾಮಾಜಿಕ ಪ್ರಾಸಂಗಿಕತೆಯನ್ನು ಖಚಿತಪಡಿಸಿದ ಸಂದೇಶ ಪ್ರಶಸ್ತಿಗಳ ಜ್ಯೂರಿ ಮಂಡಳಿಯ ಶ್ರಮಕ್ಕೂ ಈ ಸಂದರ್ಭದಲ್ಲಿ ಗೌರವ ಸಲ್ಲಿಸಲಾಯಿತು.
ಸಂದೇಶ ಪ್ರತಿಷ್ಠಾನದ ನಿರ್ದೇಶಕರಾದ ಫಾ. ಸುದೀಪ್ ಪಾಲ್ MSFS ಅವರು ಸ್ವಾಗತ ಭಾಷಣ ಮಾಡಿ, ಸಮುದಾಯವನ್ನು ಉತ್ತೇಜಿಸುವ ಹಾಗೂ ನೈತಿಕ ನಾಯಕತ್ವವನ್ನು ಪೋಷಿಸುವ ಸಾಂಸ್ಕೃತಿಕ ಅಭಿವ್ಯಕ್ತಿಗೆ ಪ್ರತಿಷ್ಠಾನದ ನಿರಂತರ ಬದ್ಧತೆಯನ್ನು ಪುನರುಚ್ಚರಿಸಿದರು. ಸಂದೇಶ ಪ್ರಶಸ್ತಿ ಆಯ್ಕೆ ಸಮಿತಿಯ ಅಧ್ಯಕ್ಷರಾದ ಡಾ. ನಾ. ದಾಮೋದರ ಶೆಟ್ಟಿ ಅವರು ಪ್ರಶಸ್ತಿಗಳ ಬಗ್ಗೆ ಪ್ರಸ್ತಾವನೆಯನ್ನು ನೀಡಿದರು. ಟ್ರಸ್ಟಿ ರಾಯ್ ಕ್ಯಾಸ್ಟೆಲಿನೋ ಅವರು ಕೃತಜ್ಞತಾ ವಂದನೆ ಸಲ್ಲಿಸಿದರು. ಕಾರ್ಯಕ್ರಮವನ್ನು ಐರೀನ್ ರೆಬೆಲ್ಲೊ ಅವರು ಸುವ್ಯವಸ್ಥಿತವಾಗಿ ನಿರ್ವಹಿಸಿದರು.
ಸಂದೇಶ ಪ್ರತಿಷ್ಠಾನವು 1989ರಲ್ಲಿ ಸ್ಥಾಪಿತವಾದ ಸಂದೇಶ ಪ್ರತಿಷ್ಠಾನವು ತರಬೇತಿ ಕಾರ್ಯಕ್ರಮಗಳು, ಹಬ್ಬಗಳು, ಸಮ್ಮೇಳನಗಳು ಮತ್ತು ಸಮುದಾಯ ಉಪಕ್ರಮಗಳ ಮೂಲಕ ಸಾಂಸ್ಕೃತಿಕ ಶಿಕ್ಷಣ ಮತ್ತು ಕಲಾ ತೊಡಗಿಸಿಕೊಳ್ಲುವಿಕೆಯನ್ನು ಉತ್ತೇಜಿಸುತ್ತಿದೆ.
ಸಮಾಜಮುಖಿ ಜವಾಬ್ದಾರಿಯೊಂದಿಗೆ ಶ್ರೇಷ್ಠತೆಯನ್ನು ಪ್ರತಿಬಿಂಬಿಸುವ ವ್ಯಕ್ತಿತ್ವಗಳನ್ನು ಗುರುತಿಸುವುದು ಸಂದೇಶ ಪ್ರಶಸ್ತಿಗಳ ಧ್ಯೇಯವಾಗಿದೆ.
