ರೈಲ್ವೆ ರಕ್ಷಣಾ ಪಡೆ ಮತ್ತು ನಿಲ್ದಾಣದ ಸಿಬ್ಬಂದಿಯ ಸಕಾಲಿಕ ಕ್ರಮದಿಂದಾಗಿ ಮರಳಿ ವಾರಸುದಾರರಿಗೆ ಸೇರಿದ ಒಡವೆ

ಉಡುಪಿ: ರೈಲ್ವೆ ರಕ್ಷಣಾ ಪಡೆ ಮತ್ತು ನಿಲ್ದಾಣದ ಸಿಬ್ಬಂದಿಯ ಸಕಾಲಿಕ ಕ್ರಮದಿಂದಾಗಿ ಚಲಿಸುತ್ತಿದ್ದ ರೈಲಿನಿಂದ ಟ್ರಾಲಿ ಬ್ಯಾಗ್ ಬಿದ್ದ ಪರಿಣಾಮ ಪ್ರಯಾಣಿಕರೊಬ್ಬರಿಗೆ ಆಗಬಹುದಾಗಿದ್ದ ದೊಡ್ಡ ನಷ್ಟ ತಪ್ಪಿದ ಘಟನೆ ಉಡುಪಿಯಲ್ಲಿ ನಡೆದಿದೆ.

ವರದಿಗಳ ಪ್ರಕಾರ, ರೈಲು ಸಂಖ್ಯೆ 16595 ರಲ್ಲಿ ME2 ಕೋಚ್, ಬರ್ತ್ ಸಂಖ್ಯೆ 9 ರಲ್ಲಿ ಪ್ರಯಾಣಿಸುತ್ತಿದ್ದ ಪ್ರಿಯಾ ಎಂಬ ಪ್ರಯಾಣಿಕರು ರೈಲು ಉಡುಪಿ ನಿಲ್ದಾಣವನ್ನು ಸಮೀಪಿಸುತ್ತಿದ್ದಾಗ ಆಕಸ್ಮಿಕವಾಗಿ ತನ್ನ ಟ್ರಾಲಿ ಬ್ಯಾಗ್ ಅನ್ನು ಕಳೆದುಕೊಡಿದ್ದಾರೆ.

ಈ ಬಗ್ಗೆ ತಕ್ಷಣವೇ ಕರ್ತವ್ಯದಲ್ಲಿದ್ದ RPF ಸಿಬ್ಬಂದಿಗೆ ವರದಿ ಮಾಡಲಾಯಿತು. ಕಾರ್ಯಪ್ರವೃತ್ತರಾದ ಆರ್ಪಿಎಫ್ ತಂಡ, ಉಡುಪಿಯ ಟ್ರ್ಯಾಕ್ ಸೇಫ್ಟಿ ಮ್ಯಾನ್ ದಯಾನಂದ್ ಅವರೊಂದಿಗೆ, ಹಳಿಗಳಿಂದ ಬಿದ್ದ ವಸ್ತುಗಳನ್ನು ಪತ್ತೆಹಚ್ಚಿದರು.

ಚೀಲದಲ್ಲಿ ಸುಮಾರು 40,000 ರೂ. ಮೌಲ್ಯದ ಮೂರು ಚಿನ್ನದ ಉಂಗುರಗಳಿದ್ದವು ಎನ್ನಲಾಗಿದೆ. ಪ್ರಿಯಾ ಅವರು ಆರ್ಪಿಎಫ್ ಮತ್ತು ನಿಲ್ದಾಣದ ಸಿಬ್ಬಂದಿಯ ಸಮಯೋಚಿತ ಮತ್ತು ಪರಿಣಾಮಕಾರಿ ಸಹಾಯಕ್ಕಾಗಿ ಕೃತಜ್ಞತೆಗಳನ್ನು ಸಲ್ಲಿಸಿದ್ದಾರೆ.