ತುಳು ಲಿಪಿಯಲ್ಲಿ ಟೈಪಿಂಗ್ ಗೆ ಹೊಸ ಕೀಬೋರ್ಡ್: ‘ಕುರಲ್ ತುಳು ಟಚ್ ʻ ಬಿಡುಗಡೆ

ಬೆಂಗಳೂರು: ತುಳು ಭಾಷೆಯನ್ನು ಡಿಜಿಟಲ್ ಜಗತ್ತಿನಲ್ಲಿ ಮತ್ತಷ್ಟು ಬಳಕೆಗೆ ತರುವ ಉದ್ದೇಶದಿಂದ ತುಳು ಲಿಪಿಯಲ್ಲೇ ನೇರವಾಗಿ ಟೈಪ್ ಮಾಡಬಹುದಾದ ನೂತನ ಕೀಬೋರ್ಡ್ವೊಂದು ಬಿಡುಗಡೆಯಾಗಿದೆ. ಆಂಡ್ರಾಯ್ಡ್ ಸ್ಮಾರ್ಟ್ಫೋನ್ ಬಳಕೆದಾರರಿಗಾಗಿ ‘ಕುರಲ್ ತುಳು ಟಚ್’ ಎಂಬ ಈ ಕೀಬೋರ್ಡ್ ಅಭಿವೃದ್ಧಿಪಡಿಸಲಾಗಿದೆ.

ಸಾಫ್ಟ್ವೇರ್ ಡೆವಲಪರ್ಗಳಾದ ಹರ್ಷಿತ್ ದೇವಾಡಿಗ ಹಾಗೂ ಚೈತ್ರ ಪೂಜಾರಿ ಅವರು ಕೀಬೋರ್ಡ್ ರೂಪಿಸಿದ್ದಾರೆ. ಬೆಂಗಳೂರಿನಲ್ಲಿ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಆಯೋಜಿಸಿದ್ದ ‘ತುಳುನಾಡ ಜಾನಪದ ಸಂಭ್ರಮ’ ಕಾರ್ಯಕ್ರಮದಲ್ಲಿ ಇದನ್ನು ಅಧಿಕೃತವಾಗಿ ಲೋಕಾರ್ಪಣೆ ಮಾಡಲಾಯಿತು.
‘ಕುರಲ್ ತುಳು ಟಚ್ ʻಪ್ರಸ್ತುತ ‘ಬರವು ಸರವು ʻಆ್ಯಪ್ ಮೂಲಕ ಆಂಡ್ರಾಯ್ಡ್ ಬಳಕೆದಾರರಿಗೆ ಲಭ್ಯವಿದೆ. ಆ್ಯಪ್ನಲ್ಲಿರುವ ‘ನ್ಯೂ ಕೀಬೋರ್ಡ್’ ಆಯ್ಕೆಯನ್ನು ಸಕ್ರಿಯಗೊಳಿಸಿದ ಬಳಿಕ ವಾಟ್ಸಾಪ್ ಸೇರಿದಂತೆ ವಿವಿಧ ಸಾಮಾಜಿಕ ಜಾಲತಾಣ ಹಾಗೂ ಮೆಸೇಜಿಂಗ್ ಆ್ಯಪ್ಗಳಲ್ಲಿ ತುಳು ಲಿಪಿಯಲ್ಲೇ ಸಂದೇಶಗಳನ್ನು ಟೈಪ್ ಮಾಡಬಹುದಾಗಿದೆ. ತುಳು ಹಾಗೂ ಇತರ ಕೀಬೋರ್ಡ್ಗಳ ನಡುವೆ ಸುಲಭವಾಗಿ ಬದಲಾಯಿಸುವ ವ್ಯವಸ್ಥೆಯ ಜೊತೆಗೆ, ಟೈಪ್ ಮಾಡಿದ ಪಠ್ಯವನ್ನು ಸ್ಟಿಕ್ಕರ್ಗಳಾಗಿ ಪರಿವರ್ತಿಸಿ ಡಿಜಿಟಲ್ ಚಾಟ್ಗಳಲ್ಲಿ ಹಂಚಿಕೊಳ್ಳುವ ಸೌಲಭ್ಯವೂ ಇದೆ.

ಸಾಮಾನ್ಯ ಮೊಬೈಲ್ ಕೀಬೋರ್ಡ್ನ ವಿನ್ಯಾಸವನ್ನು ಆಧರಿಸಿ ‘ಕುರಲ್ ತುಳು ಟಚ್ ರೂಪಿಸಲಾಗಿದೆ. ತುಳು ಅಕ್ಷರಗಳು, ಸಂಖ್ಯೆಗಳು, ಗುಣಿತಾಕ್ಷರಗಳು ಹಾಗೂ ಒತ್ತಕ್ಷರಗಳಿಗೆ ಬೆಂಬಲ ನೀಡಲಾಗಿದ್ದು, ಬಳಕೆದಾರರು ಸುಲಭವಾಗಿ ಪದಗಳನ್ನು ರಚಿಸಬಹುದು.
ತುಳು ಲಿಪಿಯನ್ನು ಕೇವಲ ಕಲಿಕೆ ಮತ್ತು ದಾಖಲೀಕರಣಕ್ಕೆ ಸೀಮಿತಗೊಳಿಸದೆ, ದೈನಂದಿನ ಮೊಬೈಲ್ ಸಂವಹನದಲ್ಲೂ ಬಳಸುವಂತೆ ಮಾಡುವುದು ಈ ಯೋಜನೆಯ ಪ್ರಮುಖ ಉದ್ದೇಶವಾಗಿದೆ.

ʻಫ್ಲಟರ್ ಮತ್ತು ‘ಫೈರ್ಬೇಸ್ ತಂತ್ರಜ್ಞಾನ ಬಳಸಿಕೊಂಡು ಸುಮಾರು ಎರಡು ವಾರಗಳ ಅವಧಿಯಲ್ಲಿ ಕೀಬೋರ್ಡ್ ಅಭಿವೃದ್ಧಿಪಡಿಸಲಾಗಿದೆ. ಮೂರು ವರ್ಷಗಳ ಹಿಂದೆ ಇದೇ ತಂಡ ನಿರ್ಮಿಸಿದ್ದ ತುಳು ಕಲಿಕಾ ಆ್ಯಪ್ನ ಮುಂದುವರಿದ ರೂಪವಾಗಿ ಈ ಯೋಜನೆ ರೂಪುಗೊಂಡಿದೆ.
ಸಣ್ಣ ಮೊಬೈಲ್ ಪರದೆಯಲ್ಲಿ ತುಳು ಅಕ್ಷರಗಳನ್ನು ಸುಲಭವಾಗಿ ಗುರುತಿಸಿ ಟೈಪ್ ಮಾಡುವಂತೆ ಫಾಂಟ್ಗಳನ್ನು ಕೀಬೋರ್ಡ್ ಲೇಔಟ್ಗೆ ನಿಖರವಾಗಿ ಹೊಂದಿಸುವುದು ಪ್ರಮುಖ ತಾಂತ್ರಿಕ ಸವಾಲಾಗಿತ್ತು ಎಂದು ಹರ್ಷಿತ್ ದೇವಾಡಿಗ ತಿಳಿಸಿದ್ದಾರೆ.

ʻಬರವು ಸರವು’ ಆ್ಯಪ್ ಕೇವಲ ಕೀಬೋರ್ಡ್ ಒದಗಿಸುವುದಷ್ಟೇ ಅಲ್ಲದೆ ತುಳು ಕಲಿಕೆಗೆ ಸಹಾಯಕವಾಗುವ ಹಲವು ಸೌಲಭ್ಯಗಳನ್ನು ಹೊಂದಿದೆ. ತುಳು ನಿಘಂಟು, ಮೂಲಭೂತ ವಾಕ್ಯಗಳು, ಆಡಿಯೋ ಆಧಾರಿತ ಕಲಿಕಾ ಸಾಮಗ್ರಿಗಳು ಹಾಗೂ ತುಳುನಾಡಿನ ಸಾಂಸ್ಕೃತಿಕ ಹಿನ್ನೆಲೆಯನ್ನು ಪರಿಚಯಿಸುವ ಛಾಯಾಚಿತ್ರಗಳು ಆ್ಯಪ್ನಲ್ಲಿ ಲಭ್ಯವಿವೆ.

ಬಳಕೆದಾರರು ಹೊಸ ಪದಗಳನ್ನು ನಿಘಂಟಿಗೆ ಸೂಚಿಸುವ ಅವಕಾಶವೂ ಇದ್ದು, ಪರಿಶೀಲನೆಯ ಬಳಿಕ ಅವುಗಳನ್ನು ಆ್ಯಪ್ಗೆ ಸೇರಿಸಲಾಗುತ್ತದೆ.
ತುಳು-ತಿಗಳಾರಿ ಲಿಪಿಗೆ ಯೂನಿಕೋಡ್ ಮಾನ್ಯತೆ ದೊರೆತಿರುವುದು ಇಂತಹ ಡಿಜಿಟಲ್ ಉಪಕ್ರಮಗಳಿಗೆ ಹೊಸ ಅವಕಾಶ ಕಲ್ಪಿಸಿದೆ. 2024ರಲ್ಲಿ ಯೂನಿಕೋಡ್ 16ರಲ್ಲಿ 80 ತುಳು ಅಕ್ಷರಗಳನ್ನು ಸೇರಿಸಲಾಗಿದ್ದು, ಇದರಿಂದ ತುಳು ಲಿಪಿಗೆ ಸಂಬಂಧಿಸಿದ ಫಾಂಟ್ಗಳು, ಕೀಬೋರ್ಡ್ಗಳು ಹಾಗೂ ಇತರ ಡಿಜಿಟಲ್ ಸಾಧನಗಳ ಅಭಿವೃದ್ಧಿಗೆ ತಾಂತ್ರಿಕ ಅಡಿಪಾಯ ಸಿಕ್ಕಿದೆ.

ತುಳು ವಿದ್ವಾಂಸರು ಹಾಗೂ ತುಳು ಸಾಹಿತ್ಯ ಅಕಾಡೆಮಿ ಸೇರಿದಂತೆ ಹಲವು ಸಂಸ್ಥೆಗಳ ನಿರಂತರ ಪ್ರಯತ್ನದ ಫಲವಾಗಿ ಈ ಬೆಳವಣಿಗೆ ಸಾಧ್ಯವಾಗಿದೆ.
ಸದ್ಯ ‘ಕುರಲ್ ತುಳು ಟಚ್’ ಕೀಬೋರ್ಡ್ ಆಂಡ್ರಾಯ್ಡ್ ಬಳಕೆದಾರರಿಗೆ ಮಾತ್ರ ಲಭ್ಯವಿದೆ. ಐಫೋನ್ ಬಳಕೆದಾರರಿಗೂ ಕೀಬೋರ್ಡ್ ಪರಿಚಯಿಸುವ ನಿಟ್ಟಿನಲ್ಲಿ ಅಭಿವೃದ್ಧಿಪಡಿಸುವ ತಂಡ ಮುಂದಿನ ಹಂತದ ಕೆಲಸಗಳನ್ನು ಕೈಗೊಳ್ಳುತ್ತಿದೆ.
ತುಳು ಲಿಪಿಯನ್ನು ಡಿಜಿಟಲ್ ಸಂವಹನದ ಭಾಗವಾಗಿಸುವ ಈ ಪ್ರಯತ್ನದಿಂದ ಯುವಪೀಳಿಗೆ ತಮ್ಮದೇ ಪಾರಂಪರಿಕ ಲಿಪಿಯಲ್ಲಿ ಮೊಬೈಲ್ ಮೂಲಕ ಸಂವಹನ ನಡೆಸಲು ಮತ್ತಷ್ಟು ಅವಕಾಶ ದೊರೆಯಲಿದೆ.